تعد الخياطة وتصميم الأزياء فنونًا تجمع بين الإبداع والمهارة، حيث يقوم المصمم بتحويل فكرة إلى قطعة أزياء جاهزة للارتداء، ولكل مصمم أسلوبه الخاص في التعامل مع المواد والألوان والقصات، وذلك ما يجعل كل تصميم فريدًا من نوعه.
في هذا الحوار، سنتحدث مع مصممة أزياء شابة وطموحة تدعى هبه ايمن تطمح لفعل الكثير في مسيرتها في عالم الازياء..
هبه كلمينا عنك!
انا هبه ايمن البلاوي من مركز مغاغة التابع لمحافظة المنيا،عندي 23سنة، طالبة بكلية الآداب قسم الاعلام شعبة الصحافة بجامعة المنيا.
لمين يعود فضل اكتشاف شغفك لحب هذا المجال؟
يعود الفضل فيه لأمي، من وانا صغيرة كنت بافصل لبس للعرايس، لحد مابقيت بعمل لبس لنفسي وكان بيعجب كل اللي بيشوفني.
وبعدها ف المرحلة الثانوية بقيت بخيط لكل قرايبي واصحابي ومؤاخراً بقي عندي براند باسم “Heba” وبقيت بعمل منتج واسلم اوردارات.
من خلال تجربتك هل يعتمد تصميم الأزياء على الخبرة فقط أم يحتاج لدراسة؟
تصميم الأزياء يعتمد أولا على الفن والإبداع لأن الأزياء تعتبر نوع من الفنون مثل فن الرسم سواء رسم عربى أو رسم الفن التشكيلى أوغيره من الفنون.
فى البداية كنت أعتمد على موهبتى فقط ومحاولة ابتكار افكار جديدة
ولكننى أيقنت أن الموهبة بمفردها ليست كافية فأصبحت أدرك أن الدراسة أيضا لها دور أساسى وبدأت أبحث بنفسى عن الدراسة حتي وجدتها.
بتتمني توصلي لاي في السنين الجاية في المجال دا؟
من فترة كنت بقول اني بحب اسم رفيف اوي وكان نفسي يبقي البراند اسمه رفيف بجد..
بس ف لحظة ادراك اني بعشق اسم ” هبه ” واني حتي مبحبش اي اسم دلع ليا خالص ومبحبش غير ان ينقلي هبه وبس.. فقولت دا كدا كدا لازم اخلي Heba بدال رفيف، وعلشان طبيعة هبه بتعشق اللون الاسود بجد فانا مضفتش اي الاوان للوجو وخليته بالاسود وبس عشان يبقي طالع مني بجد وكمان خليت الهاشتاج #براند_متخيط_بكل_حب علشان بجد دا اللي بيحصل وحقيقي انا مستمرة في اني اخلي شغلي افضل وادق ومش حابة اضغط ف اي شغل علشان موصلش لمرحلة الكروته، علشان حقيقي انا حابة البراند يبقي ويفضل متخيط بكل حب وتبقي اي قطعة منه بجد قطعة كـ هبه لصاحبها تبقي لطيفة وجميلة وف نفس الوقت مش مكلفة في المبلغ.
ونفسي بجد اسمي ينشهر اوي كبراند وكمان بتمني ان تخطيطي فان يبقي عندي مجلة فاشون يتحقق بجد وبجانب دا نفسي ابقي محاضرة ومدربة في مجال الأزياء والخياطة لان بطبعي بحب اعلم اللي حواليا اي حاجة بحبها.
ونفسي بجد اسافر برا مصر يعني بتمني يحالفني الحظ ومشيئة القدر واسافر بايروت او فرنسا.
كونك بتحلمي وبتخطي خطوات امتلاكك براند،هل الشئ دا ناتج لفعل سابق صدر منك في المجال دا ام من باب الرزق؟
هو بسبب وفي نفس الوقت لو رجعنا للاصل فهتلاقي ان تحويل اي حلم في الواقع بيترجم لرزق..
بس كنت في فترة كدا بلبس خمار ماليزي شيفون ف سنة 2017 او 2016 في يوم بجرب اني احط الخمار ع كتفي كدا ف جه ف بالي اعمله زي شيميز واسع زيه زي الخمار كدا بس اغير من شكل لبسه التقليدي، فعملت واحد ليا لونه كان زيتي وصفه كان ” مدور من وراء وقدام بس من وراءكان اطول ومن النص فيه فتحة للراس ” كان شكله قمر اوي وعجب ناس كتير خالص ناس مختمرة حبوا الفكرة وكمان اللي كانوا بيلبسوا بناطيل حبوا الفكرة بردو بحسي انه حاجة فضفاضة وكان بيتلبس من تحته قميص متناسق مع لونه او بيزك.
بعدها كل اصحابي طلبوا مني اعملهم زيها واصحاب اصحابي والدايرة المحيطة بيهم..
وفجأة لقيت كل قريتي وقري مجاورة لابسينه من تصميم وتنفيذ ايدي وكنت مبسوطه جدا إن تصاميمي عجبتهم.
والفترة اللي فاتت دي في فصل الصيف عملت تشكيلة قمصان كروهات جميلة ولطيفة جدا وفي فترة العيد عملت تصميم للبناويت الاطفال والحمدلله طلعت منه بتاع 50 قطعة.
تحبي توجهي اي للناس اللي حابة وبتفكر تخطوا في هذا المجال؟
في الاول لازم تتقبل انها هتضحي وتتنازل بملاذات كتير علشان تقدر تؤدي عملها بشكل جيد، ولازم تحط ف بالها انها لازم تسعي وتتعلم المزيد وانها متقفش عند حد معين من مستواها، المهم انها كورسات او تدرب ف الرسم والسكتش وكمان الباترون.
وانها تجعل الوظيفة دي كأسلوب حياة ومتبصش ليها ع انها مضيعة للوقت أو التسلية علشان متقعدش فاضية، وكمان لازم تستعين بالعديد من الخبرات في المجال دا في البداية وبعد كدا تتخذ لنفسها نهج خاص لتسيري عليه.
